Sport

Van Dijk jep një përditësim shqetësues kur pyetet për të ardhmen e tij tek Liverpooli

Posted on by Bota e Lajmeve

Kapiteni i Liverpoolit, Virgil Van Dijk ka dhuruar një përditësim shqetësues sa i përket të ardhmes së tij në klub.

Reprezentuesi holandez po futet në sezonin e tij të dytë si kapiten i Liverpoolit, por mund të jetë i fundit pasi kontrata e tij do të skadojë në fund të sezonit 2024/2025.

Ai ka filluar të përshtatet me jetën e re nën urdhrat e trajnerit Arne Slot dhe u paraqit në miqësoren ndaj Sevillas të dielën të cilën e fituan me rezultat 4-1.

Pas përfundimit të ndeshjes, Van Dijk foli për mediat dhe u pyet për bisedimet e kontratës, duke konfirmuar edhe një herë se nuk ka ndonjë lëvizje në këtë drejtim.

“Nuk ka ndryshime për momentin”, ka thënë Van Dijk shkurtimisht para gazetarëve, sipas The Independent.

Trent Alexander-Arnold dhe Mo Salah janë gjithashtu në 12 muajt e fundit të kontratave të tyre dhe kjo ka shprehur një shqetësim të madh për Liverpoolin, sidomos duke marr parasysh mungesën e aktivitetit në afatin kalimtar.

Van Dijk gjithashtu shtoi se prurjet e reja janë të nevojshme duke marr parasysh numrin e madh të ndeshjeve për ekipin.

“Natyrisht, mendoj se duhet të bëjmë disa blerje bazuar se sa i gjatë do të jetë sezoni, por unë mendoj se ata po punojnë prapa skenave dhe jam plotësisht i bindur dhe besoj tek klubi se do të bëjnë gjërat e duhura për ne që të konkurrojmë në çdo garë që marrim pjesë”, përfundoi ai.