Dëmtimet e dukshme në rrugën Gjilan-Ferizaj – fillon riparimi nga Ministria e Infrastrukturës

Ka filluar riparimi i rrugës së dëmtuar Gjilan-Ferizaj, pas raportimeve të ditëve të fundit mbi vështirësitë që po shkaktonte në qarkullimin e automjeteve.

Drejtori i Drejtorisë për Shërbime Publike në Komunën e Gjilanit, Kushtrim Ibrahimi, konfirmoi për median se punimet kanë nisur mbrëmë, ndonëse sipas tij, komuna nuk ka qenë pjesë e projektit.

“S’kemi qenë të përfshirë në këtë projekt, por jemi në kontakt me zyrtarët e Ministrisë së Infrastrukturës. Sipas informacioneve tona, mbrëmë ka filluar largimi i asfaltit të dëmtuar, ndërsa më pas do të vazhdohet me pastrimin e terrenit dhe asfaltimin e rrugës,” tha ai.

Sa i përket monitorimit nga ana e komunës, Ibrahimi bëri të ditur se nuk janë caktuar zyrtarë specifikë për mbikëqyrjen e punimeve, por theksoi se komuna po ndjek me interes zhvillimet, duke marrë informacione përmes komunikimeve me ministrinë.

“Nuk kemi ndonjë raport të detajuar nga ministria, përveçse kur e kërkojmë në mënyrë formale përmes email-it, telefonit apo takimeve,” shtoi ai.

Lidhur me kohëzgjatjen e punimeve, Ibrahimi tha se nuk ka një afat të saktë, por duke u bazuar në ndërhyrje të ngjashme të mëparshme, supozon se riparimi nuk do të zgjasë shumë.

“Nuk jam në dijeni se sa do të zgjasë rindërtimi i kësaj rruge. Para dy jave ka qenë pothuajse situate e njëjtë, ku atë pjesë të dëmtuar e kanë sanuar brenda ditës, mirëpo aktualisht për shkak të motit të keq, kësaj radhe mund të zgjasë më shumë”, përfundoi ai.