“Trump dhe Musk po shkatërrojnë vendin” – miliona njerëz protestojnë në mbarë botën

Miliona njerëz kanë marrë pjesë në protesta kundër presidentit amerikan Donald Trump dhe Elon Musk në të 50 shtetet amerikane dhe në mbarë botën.

Protestat u organizuan nga lëvizja pro-demokratike në përgjigje të asaj që ata e quajnë sulm ndaj të drejtave dhe lirive amerikane.

Më shumë se 1,400 protesta të quajtura “Hands off” u mbajtën përpara ndërtesave federale, selisë së shërbimeve sociale, në parqe dhe bashki – kudo.

Lëvizja bën thirrje për t’i dhënë fund pushtetit të miliarderëve mbi shtetin.

“Pavarësisht nëse jeni të motivuar nga sulmi ndaj demokracisë, pushimet nga puna, pushtimi i privatësisë apo shkatërrimi i shërbimeve publike – ky moment është i juaji”, thuhet në fletushkën e ngjarjes.

“Ne duam një refuzim të qartë dhe masiv të krizës në të cilën ndodhemi.”

Tre kërkesat kryesore të protestuesve

Organizatorët përshkruan tre kërkesa kryesore: fundin e sundimit të miliarderëve dhe korrupsionit në administratën e Donald Trump, fundin e shkurtimeve në fondet federale për Medicaid, mirëqenien dhe programet e tjera kyçe, dhe fundin e sulmeve ndaj emigrantëve, njerëzve trans dhe komuniteteve të tjera të cenueshme.

Në Parkun Kombëtar, protestuesit mbanin pankarta ku shkruhej “Mbroni Kushtetutën”, duke brohoritur “Trump duhet të shkojë”.

Ilhan Omar duke bërë thirrje për solidaritet dhe drejtësi sociale tha: “Nëse duam një vend që ende beson në sundimin e ligjit, ne duhet të luftojmë për të.”

Përfaqësuesi Maxwell Frost u bëri thirrje njerëzve që të angazhohen në veprime të drejtpërdrejta, protesta, donacione dhe nisma legjislative, shkruan CNN, përcjell Telegrafi.

Shkurtimet dhe shkarkimet në administratën shtetërore

Në Los Angeles, protestuesit marshuan drejt Bashkisë, duke brohoritur “Pushteti popullit” dhe duke mbajtur pankarta të tilla si “Larg duart nga arsimi” dhe “Rezistoni”.

Raportohet se që kur Trump mori detyrën, administrata e tij ka shkurtuar hapur shpenzimet e qeverisë, pavarësisht nga pasojat.

Mijëra punonjës të qeverisë janë pushuar nga puna si pjesë e planit të Trump dhe Musk.

Elon Musk, njeriu më i pasur në botë dhe kreu i “Ministrisë së Efiçencës së Qeverisë” të sapokrijuar, mburret se ka bllokuar Agjencinë Amerikane për Zhvillim Ndërkombëtar (USAID).

Ndërkohë, programet e ndihmës për demokracitë e reja jashtë vendit janë mbyllur dhe punëtorët që mbikëqyrin zgjedhjet në SHBA janë lënë në pushim në atë që ish-zyrtarët dhe zyrtarët aktualë e shohin si një tradhti të vlerave demokratike amerikane.

Sulm ndaj politikave klimatike dhe të drejtave të imigracionit

Administrata gjithashtu filloi një valë të madhe deportimesh, rriti presionin mbi shërbimet e emigracionit dhe së fundmi deportoi gabimisht një burrë nga El Salvador.

Administrata Trump mohon ndryshimet klimatike dhe shfuqizon rregulloret për emetimet nga automjetet dhe termocentralet.

Ata njoftuan gjithashtu një rishikim të të gjitha rregullave të armëve dhe proceseve gjyqësore që mund të kufizojnë të drejtën për të zotëruar një armë.