Aktuale, Lajme

Kurti në Bruksel: Kosova nën masa, Serbia me përkrahje – edhe kur strehon terroristë

Posted on by botaelajmeve

Ndërsa Kosova vazhdon të mbetet nën masa ndëshkuese nga Bashkimi Evropian, pavarësisht angazhimit të saj për demokratizim dhe forcim të sundimit të ligjit, kryeministri në detyrë, Albin Kurti, ka adresuar kritika të forta ndaj qasjes së BE-së ndaj Kosovës dhe Serbisë.

Duke folur në ngjarjen e rilansimit të Programit “Willy Brandt” për zgjerimin e BE-së, të organizuar nga grupi i Socialistëve dhe Demokratëve në Parlamentin Evropian, Kurti theksoi se përkushtimi i Kosovës është vlerësuar vetëm në teori, ndërkohë që Serbia, sipas tij, ka përfituar përkrahje konkrete, pavarësisht akuzave për strehim të pjesëmarrësve në sulmin në Banjskë.

“Përpjekjet tona për demokraci dhe sundim të ligjit janë pranuar me fjalë të mira, por shumë rrallë me veprime konkrete. Politikat tona janë pëlqyer, por jo mbështetur. Ndërsa ato të fqinjit tonë verior – që shpesh janë kundër vlerave të BE-së – janë përkrahur, pavarësisht se ai sot strehon terroristë dhe provokon destabilizim,” tha Kurti.

Ndërkohë, në hapjen e programit “Willy Brandt”, përfaqësues të lartë evropianë theksuan synimin për thellimin e bashkëpunimit me vendet që synojnë anëtarësimin në Bashkimin Evropian.

“Misioni ynë është i qartë: ta bëjmë Evropën të plotë dhe të kompletuar,” thuhet në mesazhin hyrës të programit.