Dy policët e dyshuar për ryshfet dalin para Gjykatës në Pejë për caktimin e masës së sigurisë

Dy zyrtarët policorë që gjatë ditës së djeshme me 20.04.2025 janë arrestuar në Pejë nën dyshimin për marrje ryshfeti, sot kanë dalë para Gjykatës, në seancën për caktimin e masës së sigurisë.

Policët janë të njësisë së trafikut rrugor dhe dyshohet se kanë kërkuar para nga një qytetar, të cilin e kanë ndaluar për kontroll rutinor.

Prokurori i Shtetit ka kërkuar caktimin e masës së arrestit shtëpiak, si dhe të dy të dyshuarit të pezullohen nga puna.

Inspektorati Policor i Kosovës dje ka njoftuar se ka pranuar gjatë ditës një informacion nga një qytetar i cili pretendoonte se dy zyrtarët policorë kanë keqpërdorur detyrën zyrtare.

Hetuesit e IPK-së kishin pranuar informacione se zyrtarët policorë e kishin ndaluar qytetarin në një pikë kontrolli dhe për të mos i shqiptuar gjobë i kanë kërkuar qytetarit një shumë  monetare.

“Pas veprimeve paraprake hetimore të kryera nga hetuesit e IPK-së, janë arrestuar dy zyrtarët policorë me dyshimin  se kanë kryer veprën penale “Marrja e ryshfetit” dhe të njëjtëve me vendim të prokurorit u është caktuar masa e ndalimit për 48 orë”- thuhej në njoftimin e IPK-së.