Pa marrëveshje politike, nuk ka as kryetar të Kuvendit dhe as të Qeverisë

Deputeti i Lidhjes Demokratike të Kosovës, Armend Zemaj tha se është e rëndësishme të potencohet se pa marrëveshje politike nuk ka zgjidhje të kryetarit të Kuvendit dhe Qeverisë.

Zemaj tha tutje se qëndrimi i LDK-së është i qartë dhe se kanë ofruar zgjidhje që ndonëse është kalimtare, është e domosdoshme.

“Është me rëndësi të potencohet se pa marrëveshje politike nuk ka zgjidhje as të kryetarit të Kuvendit, dhe as të Qeverisë së re”, tha ai.

Zemaj duke folur për takimin e sotëm të presidentes Vjosa Osmani me përfaqësues partiakë tha se roli i presidentes është të bëj konsultime të ndryshme me qëllim të formimit të institucioneve të reja të Kosovës.

Ai po ashtu përmendi rritjen e çmimeve të produkteve të ndryshme në vend dhe kjo sipas tij është në ndërgjegjen e partisë së parë për zgjedhjen e kryetarit të Kuvendit dhe Qeverisë.

Ai tha se zgjedhjet e fundit e kanë dhënë këtë rezultat, ndërsa situatën e ka krijuar LVV që sipas tij, siç duket askush nuk dëshiron të bashkëpunojë me ta. /Telegrafi/