Hiqet instalacioni me këpucë para Kryeministrisë në Tiranë

Protesta në Tiranë ka hyrë këtë të diel në ditën e 29-të, ndërsa gjatë mesditës janë shënuar tensione mes protestuesve dhe policisë në bulevardin përballë Kryeministrisë.

Protestuesit, të cilët kanë qëndruar përgjatë gjithë natës në bulevard, janë përballur me forcat e policisë që kanë kërkuar lirimin e hapësirës publike. Situata u tensionua pasi zyrtarët policorë hoqën instalacionin me këpucë, të vendosur në shkallët e Kryeministrisë, i cili sipas protestuesve simbolizonte largimin e të rinjve nga vendi dhe emigrimin jashtë Shqipërisë.

Protestuesit kundërshtuan veprimin e policisë, duke kërkuar procesverbal për heqjen e instalacionit dhe duke pretenduar se ndërhyrja po bëhej pa procedurë të qartë.

Gjatë përplasjes, disa prej tyre u përpoqën të ndalonin policinë që të merrte këpucët, por pa sukses. Tensione pati edhe në një moment tjetër, kur një efektiv policie i mori telefonin një protestuesi që po filmonte situatën. Pas reagimeve të protestuesve, telefoni iu kthye sërish qytetarit.

Protesta pritet të vazhdojë sonte në mbrëmje. Në orën 19:00, protestuesit është paralajmëruar se do të mblidhen në Sheshin “Skënderbej”, prej nga do të marshojnë drejt Kryeministrisë, ku pritet të mbahen edhe disa fjalime.