“Disponim minimal”, as presidentja nuk arrin t’i bind liderët për zhbllokimin e ngërçit në Kuvend – ja hapat e mëtejshëm

Presidentja Vjosa Osmani tha se nuk e ka problem që bllokadën në Kuvend ta dërgojë në Gjykatën Kushtetuese.

Por, ajo tha se këtë do ta shqyrtojë vetëm nëse procesi zvarritet edhe më shumë dhe po ashtu njoftoi se për këtë ka folur edhe me liderët partiakë në takimin e sotëm.

“Nëse kjo zvarritet shumë, janë disa opsione që vetë deputetët ta shfrytëzojnë.

Deri tani AAK ka kontestuar një vendim, por që lidhet me formën e votimit jo domosdo me proceset tjera. Të shfrytëzoj prerogativat kushtetuese dhe t’i drejtohem Gjykatës Kushtetuese. Sot ajo çfarë kam shprehur para liderëve, që nëse do të kishte pajtim edhe nga ana e tyre, unë nuk kam ndonjë problem që ta dërgoj këtë çështje në Gjykatën Kushtetuese, nuk pat ndonjë kundërshtim nga asnjëri prej tyre. Megjithatë, ne do të presim nëse ditët në vijim do të rezultojnë me marrëveshje politike apo arritje të një marrëveshje më të gjerë për konstituimin e Kuvendit para se të procedojmë me diçka e tillë”.

Osmani pas takimit me liderët: Disponim minimal që do të rritet me kalimin e kohës, që shpresoj të mos jetë e gjatë

Presidentja e Kosovës, Vjosa Osmani, tha se pasojat kryesore të moskonstituimit të Kuvendit i bart vendi dhe qytetarët.

“Desha të iu njoftoj për disa prej çështjeve që i diskutuam në takimin e parë . Sot bëhet një muaj nga seanca e parë që e kam thirrë më 15 prill por fatkeqësisht edhe pas 16 përpjekjeve nuk ka pasur rezultat në konstituimin e kuvendit. Moskonstituimi i kuvendit mund t’i duket dikujt se dëmton vetëm politikanë apo parti të caktuara, megjithatë pasojat kryesore i bart vendi ynë dhe të gjithë qytetarët tanë pa dallim”, tha ajo.

“Kushtetuta e Kosovës ndër parimet themelore parasheh se parimi i ndarjes së pushteteve apo parimi I kontrollit dhe balancit është një ndër vlerat dhe parakushtet e funksionimit kushtetues të institucioneve dhe një ndër shtyllat që parashihet aty është edhe legjislativi. Në situatën aktuale me mungesën e kuvendit funksional po rrezikohet ky parim kushtetuese. Prandaj dhe sot në takimin e parë i kam inkurajuar liderët e partive politike që në funksion të realizimit të këtij parimi kushtetues të gjejnë zgjidhje të përbashkët për konstituimin e kuvendit që përveçse do të siguronte funksionimin kushtetues të institucioneve, po ashtu do të hapte rrugë për krijimin e qeverisë së re.”

“Ky është vetëm takimi i parë, nëse shihet e nevojshme nga java e tjetër do të takoj liderët e partive individualisht.”

Presidentja e vendit, Vjosa Osmani, i ka përgëzuar liderët politikë që ishin pjesë e takimit të thirrur nga e para e shtetit për siç tha, qasjen konstruktive që kishin.

Osmani tha se ndonëse kishin qëndrime të ndryshme në shumicën dërmuese të temave, ekziston një disponim minimal për të dalë nga kriza.

Kryetari i LDK-së, Lumir Abdixhiku, ka thënë se nga takimi me presidenten Vjosa Osmani nuk pati ndonjë zgjidhje të moskonsitutimit të Kuvendit të Kosovës.

Në një konferencë për media pas përfundimit të takimit me presidenten Vjosa Osmani dhe me liderët e partive të tjera politike, ai ka pohuar se nuk pati ide të tjera për të gjetur një zgjidhje.

“Patëm një takim konsultativ të thirrur nga Osmani, partitë politike janë në pozicionet e tyre paraprake, nënkupton se nuk ka ndonjë zgidhje evetuale për ngërgin politik.

 Nuk ka iniciativë që do të zhvillojë gjendjen e tanishme”, ka thënë Abdixhiku.

Memli Krasniqi, kryetari i PDK-së, pas takimit të krerëve politik me presidenten e vendit, Vjosa Osmani, ka thënë se situata vazhdon të jetë e njëjtë dhe se problemi është politik.

“Më shumë se problem juridik, kemi problem politik. Kjo krizë nuk është procedurale por politike dhe do të duhej të kishte zgjidhje politike. Por nëse vazhdon kjo qasje autoritare pa e pasur shumicën parlamentare, atëherë e kemi obligim që të bëjmë çmos për zgjidhje”, ka thënë ai.

“Ishte një diskutim brenda pozicioneve që i di opinioni publik. Në emër të PDK-së i kërkova edhe një herë kryetarit të LVV-së, Albin Kurti të vjen me një propozim tjetër, e që ka mjaft në grupin e tij parlamentar që marrin shumicën parlamentare. Një gjë e tillë s’besoj që do të ndodhë. Jemi fatkeqësisht pothuajse në situatën e njëjtë”, ka thënë ai.

Ai e ka quajtur takimin si një hap shtesë edhe nga ana e presidentes në mënyrë që të gjendet rrugëdalja.

Krasniqi ka thënë se ka kërkuar nga presidentja Osmani, që të garantohet funksionimi kushtetues i institucioneve nëpërmjet Gjykatës Kushtetuese.

“Në një moment kur ta vlerëson, e që besoj që ai është afër, presidentja t’i drejtohet Gjykatës Kushtetuese me pyetje kushtetuese, të cilat në të kaluarën s’i ka pranuar gjykata. Por sipas praktikave të Komisionit të Venecias, në raste tepër të rëndësishme ka përjashtime nga precedenti”, ka thënë ai.

Nuk është shënuar ndonjë përparim për ta zhbllokuar ngërçin politik – pas dështimeve të njëpasnjëshme të deputetëve për konstituimin e Kuvendit të Kosovës – as pas një takimi të presidentes Vjosa Osmani me shefat e partive parlamentare të enjten.

Kryetari i Lidhjes Demokratike të Kosovës, Lumir Abdixhiku, tha se partitë politike kryesisht qëndruan në pozicionet e tyre paraprake, “që nënkupton se nuk ka ndonjë zgjidhje eventuale për ngërçin politik dhe nuk ka as iniciativë që do të zhbllokojë këtë gjendje të tanishme”.

Memli Krasniqi i Partisë Demokratike të Kosovës tha se “siç mund ta shihni, nuk ka dalë tym i bardhë, pra nuk ka risi”.

“Nuk jam optimist që Kurti do ta ndërrojë propozimin. Ai nuk i ka votat as për komision as për kryetare e as për kryeministër. Duke mos i pasur votat po e mban peng krejt shtetin”, tha Krasniqi pas takimit.

Pas takimit me shefat e partive shqiptare, Osmani do të zhvillojë bisedime me pakicat në orën 15:00.

Takimi vjen në ditën kur deputetët nuk arritën ta konstituojnë Kuvendin as në tentimin e gjashtëmbëdhjetë – pikërisht një muaj pasi filluan përpjekjet – për shkak të ndarjeve politike. Konstituimi i Kuvendit është i domosdoshëm për të hapur rrugë për formimin e Qeverisë së re.

Liderët e partive, LVV, PDK, LDK dhe AAK tashmë kanë arritur në presidencë për takimin e thirrur nga e para e shtetit, Vjosa Osmani.

Në zyrë janë futur Albin Kurti, Memli Krasniqi, Lumir Abdixhiku dhe Ramush Haradinaj.

Në këtë takim pritet të gjendet zgjidhja për ngërçin politik, më saktësisht për bllokimin e Kuvendit të Kosovës i cili po vazhdon tash e 16-të me radhë pasi opozita është kundër kandidates për kryetare të Parlamentit, Albulena Haxhiu.

Për këtë të fundit, ata thonë se nuk është figurë unifikuese për këtë pozitë.

——–

Presidentja Vjosa Osmani, sot do të pres në takime konsultative partitë politike, në funksion të përpjekjeve për zhbllokimin e situatës në Kuvend.

Mësohet se takimi me partitë shumicë mbahet me fillim nga ora 13:00, ndërkaq takimi me partitë joshumicë mbahet me fillim nga ora 15:00.

E ftesës të së parës së vendit, iu përgjigjen pozitivisht të gjitha subjektet politike.

Sot, po ashtu Kuvendi i Kosovës do të mblidhet për herë të 16-të, pasi 15 herët paraprake dështoi të arrinte konstituimin e tij.