Nga 1 korriku polica e sigurimit falas për bashkatdhetarët që udhëtojnë në Kosovë

Duke filluar nga 1 korriku të gjithë bashkatdhetarët që udhëtojnë për në Kosovë me automjete për pasagjerë, do të mund të marrin policën e sigurimit falas në cilëndo prej pikave kufitare hyrëse.

Kështu tha gjatë mbledhjes së Qeverisë, kryeminsitri në detyrë Albin Kurti.

Sipas tij, polica e subvencionuar do të subvencionohet për automjetet jo-komerciale për pasagjerë, deri në 9 ulëse.

“Me stinën e verës, të gjithë e dimë se vijnë edhe bashkatdhetarët tanë. Mirëseardhja jonë e parë për ta është në pikat kufitare. Edhe sivjet, sikurse viteve të mëparshme, duke filluar nga data 1 korrik, të gjithë bashkatdhetarët që udhëtojnë për në Kosovë me automjete për pasagjerë, do të mund të marrin policën e sigurimit falas në cilëndo prej pikave kufitare hyrëse. Polica e subvencionuar do të subvencionohet për automjetet jo-komerciale për pasagjerë, deri në 9 ulëse”, tha Kurti.

Ai po ashtu theksoi se “Për këtë qëllim, sot do të ndajmë 4,000,000 Euro nga masa “Mbështetje për Mërgatën” e Pakos së Ringjalljes Ekonomike”.