Kronikë e zezë

Nëntë të lënduar në aksident zinxhiror në Gllarevë të Klinës

Posted on by botaelajmeve

Nëntë persona kanë mbetur të lënduar, një prej tyre rëndë, pas një aksidenti trafiku që ndodhi të shtunën rreth orës 18:35 në fshatin Gllarevë të Klinës.

Zëdhënësi i Policisë Rajonale në Pejë, Fadil Gashi, konfirmoi se në përplasjen zinxhirore u përfshinë tri vetura.

“Sipas mjekut kujdestar, njëri nga të lënduarit ka pësuar lëndime serioze, ndërsa tetë të tjerët kanë marrë lëndime më të lehta. Të gjithë po marrin trajtim mjekësor në Spitalin Rajonal të Pejës. Tetë persona janë jashtë rrezikut për jetë”, deklaroi Gashi.
Njësitet e trafikut dhe hetuesit rajonalë dolën menjëherë në vendin e ngjarjes për të kryer ekzaminimet e nevojshme dhe për të hapur rrugën për qarkullim.

Policia ka nisur hetimet për të përcaktuar shkaqet dhe rrethanat e sakta të aksidentit.