Aksion bastisjeje në disa pavijone të Dubravës – të angazhuar 80 oficerë dhe Njësia K9

Në Qendrën Korrektuese në Dubravë është realizuar një bastisje në disa pavijone të institucionit, ku u angazhuan 80 oficerë të sigurisë si dhe Njësia K9 e Shërbimit Korrektues të Kosovës (SHKK), transmeton KosovaPost.

Sipas njoftimit zyrtar, qëllimi kryesor i këtij aksioni ishte luftimi i dukurive kontrabanduese, me fokus të veçantë në parandalimin e futjes dhe shpërndarjes së substancave narkotike brenda institucionit.

“Gjatë bastisjes nuk është hasur asnjë material i ndaluar apo substancë e jashtëligjshme, çka dëshmon një gjendje të kontrolluar dhe mbikëqyrje efektive brenda pavijoneve të kontrolluara. Shërbimi Korrektues i Kosovës mbetet i përkushtuar që, përmes veprimeve parandaluese dhe kontrolleve të rregullta, të garantojë sigurinë dhe rendin brenda institucioneve korrektuese, duke mbrojtur integritetin e sistemit korrektues në vend”, thuhet në njoftim.