Nga vrasjet e trafiku i drogës te vilat luksoze/ 26 milionë euro pasuri i bllokohen ‘biznesmenit’ shqiptar

Prokuroria e Tiranës ka sekuestruar pasuri me vlerë mbi 26 milionë euro të 45-vjeçarit Kristian Koni, i njohur edhe si Olsi Meta dhe me katër identitete të tjera. Në listën e sekuestrove përfshihen 19 prona, vila luksoze, automjete të shtrenjta dhe dhjetëra llogari bankare, të cilat dyshohet se janë ngritur mbi aktivitetin kriminal ndër vite.

Hetimet kanë zbuluar se pasuria e Konit është regjistruar jo vetëm në emrin e tij, por edhe të nënës së tij pensioniste dhe të kompanisë “Kriol.al”, e cila dyshohet se ka shërbyer si mbulesë për pastrim parash. Shifrat e përfshira dhe larmia e bizneseve fiktive kanë ngritur dyshime serioze për origjinën e paligjshme të këtyre të ardhurave.

Kristian Koni nuk është një emër i panjohur për drejtësinë. Ai ka qenë i dënuar për vrasje me paramendim, ndërsa në Itali është akuzuar si pjesë e një rrjeti të trafikut ndërkombëtar të drogës, me lidhje të forta me Camorran napoletane. Autoritetet italiane e kanë cilësuar dikur si “koka e organizatës” që furnizonte me kokainë qytete të ndryshme nga Bolonja deri në Puglia.

Nga krimet e së shkuarës, Koni ka arritur të ndërtojë një perandori pasurie në Shqipëri, duke u shfaqur si “biznesmen”. Policia ka publikuar foto të vilave të tij në Tiranë dhe Palasë, ndërsa hetimet vazhdojnë për gjurmimin e pasurive të tjera që dyshohet se kanë origjinë nga droga dhe krimi.