BE e Franca dënojnë shkeljen e hapësirës ajrore të Polonisë nga dronët rusë

Bashkimi Evropian ka shprehur solidaritet të plotë me Poloninë pas shkeljes së hapësirës ajrore të saj nga dronët rusë gjatë një sulmi ajror ndaj Ukrainës perëndimore. Presidenti i Këshillit Evropian, Antonio Costa, e cilësoi ngjarjen si një kërcënim serioz për sigurinë e të gjithë kontinentit.

“Ngjarjet e mbrëmshme janë një kujtesë e fortë se siguria e njërit është siguria e të gjithëve,” deklaroi Costa në një postim në platformën X.

Ai theksoi se “agresioni i vazhdueshëm i Rusisë kundër Ukrainës dhe shkeljet e pakujdesshme të hapësirës ajrore të vendeve anëtare të BE-së përbëjnë një kërcënim të drejtpërdrejtë për sigurinë e të gjithë evropianëve dhe për infrastrukturën kritike në gjithë kontinentin tonë.”

Diplomatja më e lartë e Bashkimit Evropian, Kaja Kallas, ka thënë se treguesit e hershëm sugjerojnë se hyrja e dronëve rusë në hapësirën ajrore evropiane ishte e qëllimshme, jo aksidentale.

Ajo ka shkruar të mërkurën në X se lufta e Rusisë po vazhdon të përshkallëzohet.

“Ne duhet të rrisim koston për Moskën, të forcojmë mbështetjen për Ukrainën dhe të investojmë në mbrojtjen e Evropës. BE-ja luan një rol të madh dhe ne do të mbështesim iniciativa si linja mbrojtëse e kufirit lindor”, ka shkruar Kallas.

Ajo e ka përshkruar sulmin rus, ku dronët hynë në hapësirën ajrore polake, si “shkeljen më serioze të hapësirës ajrore evropiane nga Rusia që nga fillimi i luftës.”

Kallas ka shtuar se është në kontakt me Sekretarin e Përgjithshëm të NATO-s, Mark Rutte, dhe Zëvendëskryeministrin e Polonisë, Radosław Sikorski.

“BE-ja qëndron në solidaritet të plotë me Poloninë”, ka thënë Kallas.

Edhe Presidenti i Francës, Emmanuel Macron, reagoi me forcë, duke e cilësuar shkeljen e hapësirës ajrore të Polonisë si “thjesht të papranueshme”.

“Nuk do të bëjmë kompromis mbi sigurinë e aleatëve tanë,” shkroi Macron në një postim në X, duke shtuar se së shpejti do të zhvillojë një bisedë me Sekretarin e Përgjithshëm të NATO-s, Mark Rutte, lidhur me situatën.

Kjo ngjarje ndodh në një moment të tensionuar për sigurinë evropiane, ndërsa BE dhe NATO vijojnë të theksojnë rëndësinë e mbrojtjes së integritetit territorial të vendeve anëtare dhe mbështetjes së pandërprerë për Ukrainën përballë agresionit rus.