Aktuale, Lajme

Kurti dhe senatorja Shaheen flasin për sundimin e ligjit në Kosovë

Posted on by botaelajmeve

Kryeministri në detyrë i Republikës së Kosovës, Albin Kurti, vazhdoi takimet sot në Washington D.C., të Shteteve të Bashkuara të Amerikës.

Ai, bashkë me zëvendësministren e Punëve të Jashtme dhe Diasporës, Liza Gashi, dhe ambasadorin e Republikës së Kosovës në ShBA, Ilir Dugolli, takoi senatoren demokrate nga New Hampshire, Jeanne Shaheen.

Marrëdhëniet bilaterale, zhvillimet e fundit në vend, progresi ekonomik, investimet në mbrojtje, përmirësimi në siguri dhe sundim të ligjit ishin ndër temat e diskutimit.

Kurti veçoi bashkëpunimin me Shtetet e Bashkuara të Amerikës në fushën e mbrojtjes, vendimin e Qeverisë për heqjen e tarifës doganore ndaj të gjitha produkteve me origjinë nga ShBA-ja dhe vazhdimin e programit Kompakt të Korporatës së Sfidave të Mijëvjeçarit për Kosovën nga administrata e re amerikane, si zhvillimet kryesore dhe me interes të përbashkët në kuadër të raporteve dypalëshe Kosovë-ShBA.

Senatorja Shaheen kishte vizituar vendin tonë pas sulmit terrorist dhe paramilitar të 24 shtatorit 2023 në Banjskë të Zveçanit dhe ka bërë thirrje të vazhdueshme për arrestimin e Millan Radoiçiq – i cili, siç theksoi kryeministri në detyrë, edhe dy vjet pas sulmit dhe pranimit të fajësisë vazhdon të jetë e të lihet i lirë në Serbi.