Lajme

Fondi për të Drejtën Humanitare kritikon ashpër Serbinë për dënimet e ulëta ndaj krimeve të luftës

Posted on by botaelajmeve

Serbia vazhdon të shqiptojë dënime minimale për krimet e luftës, duke zbehur rëndësinë e drejtësisë për viktimat dhe familjet e tyre — është ky mesazhi kryesor i reagimit të ashpër të Fondit për të Drejtën Humanitare (FHP), pas shpalljes së dënimeve në rastin e rrëmbimit dhe vrasjes së 20 civilëve boshnjakë në Shtrpce të BeH-së më 1993.

Departamenti për krime lufte pranë Gjykatës së Lartë në Beograd, në një proces të përsëritur, shpalli fajtorë Gojko Lukić, Duško Vasiljević dhe Dragana Djekiq për rrëmbimin, torturimin dhe vrasjen e civilëve të nxjerrë me forcë nga treni në linjën Beograd–Bar. Por dënimet prej vetëm 5 deri në 10 vjet burg u cilësuan nga FHP si thellësisht të padrejta dhe të papërshtatshme për një nga krimet më të rënda të luftës ndaj civilëve në territorin e ish-Jugosllavisë.

Fondi thekson se vendimi i gjykatës serbe “shkel ndjenjën e drejtësisë” dhe demonstron mungesën e vullnetit real të shtetit serb për të ndëshkuar seriozisht krimet e luftës.

“Është tronditëse që për një krim të tillë – ku u rrëmbyen dhe u vranë 20 civilë të pafajshëm, përfshirë edhe një të mitur, Senad Zeceviq – gjykata ka shqiptuar dënime që në përkthim praktik nënkuptojnë vetëm gjashtë muaj burg për secilën jetë të humbur,” thuhet në reagimin e FHP-së.

Fondi vlerëson se gjykata ka marrë parasysh vetëm rrethana lehtësuese, si gjendja familjare e të akuzuarve apo mosha e mitur e Dragana Djekiq në kohën e krimit, duke anashkaluar krejtësisht peshën e veprave dhe dhimbjen e shkaktuar për dekada të tëra.

Për më shumë, FHP rikujton se ky proces gjyqësor ka zgjatur mbi shtatë vjet, ndërsa viktimat dhe familjarët e tyre kanë pritur mbi 33 vjet për drejtësi, dhe ende nuk e dinë vendndodhjen e trupave të 16 prej të vrarëve.

Megjithatë, gjatë këtij procesi u zbardhën fakte të rëndësishme që konfirmojnë se krimi ishte i planifikuar dhe se në të morën pjesë struktura shtetërore të SRJ-së. Në sallën e gjyqit dëshmoi edhe krimineli i njohur Milan Lukiq, i cili pranoi se njësia e tij “Osvetnici” ishte pjesë e Ushtrisë së Republikës Serbe (VRS).

Gjithashtu, përmes dëshmive të tjera, u vërtetua se në krim kishte marrë pjesë edhe një grua – Dragana Djekiq – duke rrëzuar pretendimet e mëhershme për përjashtimin e saj nga përgjegjësia penale.

FHP thekson se dënime të tilla të ulëta janë një tjetër provë se drejtësia për krimet e luftës në Serbi vazhdon të jetë selektive dhe pa ndjeshmëri ndaj viktimave.

“Me këtë lloj drejtësie, shteti serb nuk arrin të përmbushë as standardet më minimale të përgjegjësisë për krimet e luftës. Kjo është një fyerje për viktimat dhe për të gjithë ata që kërkojnë të vërtetën dhe drejtësinë,” përfundon deklarata.