“Osmani nderon Harry Bajraktarin me çmimin e lartë shtetëror ‘Urdhri i Lirisë’”

Presidentja e Kosovës, Vjosa Osmani, ka dekoruar sot Harry Bajraktarin me “Urdhrin e Lirisë”, si vlerësim për kontributin e tij të jashtëzakonshëm për lirinë, pavarësinë dhe shtetndërtimin e Kosovës.

Osmani përmes një postimi në Facebook, tha se për më shumë se tri dekada Bajraktari ka qenë një nga zërat më të fuqishëm të Kosovës në Shtetet e Bashkuara, duke bashkëpunuar ngushtë me Presidentin historik Ibrahim Rugova dhe duke përfaqësuar çështjen e Kosovës para institucioneve amerikane në periudha vendimtare.

“Gjithashtu, ai ka qenë mbështetës i palëkundur i luftës së Ushtrisë Çlirimtare të Kosovës, si dhe ka ngritur zërin e komunitetit shqiptaro-amerikan në arenën ndërkombëtare.

Me përkushtim të pandalur, ai ka ndërtuar ura të rëndësishme bashkëpunimi me Shtëpinë e Bardhë, Kongresin amerikan dhe me udhëheqës të tjerë në SHBA, duke mbështetur Kosovën në momentet vendimtare dhe duke qëndruar krah popullit tonë.

Harry Bajraktari, faleminderit për gjithçka që keni bërë për Kosovën.

Urime dhe mirënjohje e përjetshme”, shkroi e para e shtetit.