Berisha: Rama kërkoi përleshje, e garantoj se demonstruesit do përleshen me të

Kreu i Partisë Demokratike, Sali Berisha, ka reaguar pas protestës kombëtare të kësaj force politike ndaj qeverisë, duke akuzuar kryeministrin Edi Rama për provokim të protestuesve.

Sipas Berishës autoritetet policore kanë përdorur forcë të tepruar – gaz lotsjellës, dhe mjete të tjera – ndaj protestuesve paqësorë siç i quajti ai.

Kreu i PD-së, theksoi se demonstruesit nuk do të përleshen me policinë, por me vetë kryeministrin Rama, duke e konsideruar atë përgjegjës kryesor për situatën.

“Tani, përkundrejt qëndrimit qytetar, guximtar të protestuesve, narkopolicia përdori në agresivitet absolut, mjetet e dhunës, sulmoi në mënyrë të çmendur protestuesit me gaze helmuese, me topa uji dhe me mjete të tjera.

Domethënë, Edi Rama kërkonte përleshjen e policisë, e demonstruesve me policinë. E garantoj që demonstruesit do të përleshen me Edi Ramën. Dhe i them këtu, mos ndërse policinë kundër protestuesve.

U bëj thirrje policëve, mos u bëni ushtarë, shërbëtorë të një njeriu që nuk ka ligj as moral. Mos u bëni shërbëtorë të një njeriu që çdo tullë të shtëpisë së vet e ka të vjedhur.

Mos u bëni shërbëtorë të një njeriu që është armik i egër i çdo shqiptari. Sot duhet të ndjeheni krenarë për aktin tuaj. Duhet të betohemi se me këtë betejë, kilometri ynë i fundit do jetë fundi i merituar i Edi Ramës dhe narkoqeveritarëve të tjera”, u shpreh Berisha.

Ai bëri thirrje të drejtpërdrejtë për lirimin e menjëhershëm të 25 protestuesve të arrestuar, të cilët, sipas tij, nuk kanë kryer asnjë shkelje dhe janë mbajtur vetëm si akt hakmarrjeje politike.

“Kërkoj lirimin e menjëhershëm të 25 protestuesve paqësorë, të cilët në mënyrë absolute me të gjithë dokumentacionin, nuk kanë kryer asnjë akt dhe janë marrë aty vetëm si akt urrejtje me urdhër të Edi Ramës.

U kërkoj komisariateve t’i lirojnë menjëherë, të mos zbatojnë asnjë urdhër që vjen në kundërshtim me ligjet dhe Kushtetutën e vendit. Nuk mundet kurrë një popull me asgjë.

Ju e patë vetë, ju ishit vetë aty. Ju e patë gatishmërinë e atyre njerëzve që ishin të gatshëm t’i jepnin Edi Ramës për 30 minuta atë që meritonte. Absolutisht kjo gatishmëri do vazhdojë.

Ne këtë betejë do e vazhdojmë”, tha më tej Berisha ndërsa shtoi se “ne kemi një mision dhe vetëm një mision, përmbysjen e këtij regjimi kriminal, e këtij narkoregjimi, e këtij armiku të shqiptarëve dhe të Shqipërisë. Asgjë nuk e shpëton më këtë. Asgjë nuk e shpëton. Fatin e Enver Hoxhës do ketë.”