Irani: Su*lmet e Izr@elit në Liban rrezikojnë armëpushimin

Irani ka paralajmëruar se sulmet izraelite kundër Hezbollahut në Liban mund të rrezikojnë armëpushimin e Teheranit me SHBA-në, pasi kryeministri izraelit urdhëroi sulme në periferitë jugore të Bejrutit.

Ministri i Jashtëm iranian, Abbas Araghchi, tha se marrëveshja me SHBA-në ishte “qartësisht armëpushim në të gjitha frontet, përfshirë Libanin” dhe se “shkelja në një front është shkelje e armëpushimit në të gjitha frontet”.

Më herët, Benjamin Netanyahu njoftoi se do të goditeshin “objektiva terroriste” në Dahieh, si përgjigje ndaj sulmeve me raketa dhe dronë të Hezbollahut kundër civilëve izraelitë dhe shkeljeve të tjera të armëpushimit të shpallur në prill.

Ndërkohë, agjencia iraniane Tasnim raportoi se Teherani mund të pezullojë negociatat indirekte me SHBA-në.

Agjencia, e lidhur me Gardën Revolucionare Islamike të Iranit (IRGC), tha gjithashtu se Irani dhe aleatët e tij mund të “aktivizojnë fronte të tjera, përfshirë Ngushticën Bab al-Mandab” në hyrje të Detit të Kuq.

Autoritetet iraniane nuk e kanë komentuar publikisht këtë raport, por televizioni shtetëror iranian tha se gjasat për përfundimin e armëpushimit me SHBA-në janë të larta nëse Izraeli nuk i ndal sulmet në Liban. Armëpushimi hyri në fuqi më 8 prill.

SHBA-ja është përpjekur t’i ndajë zhvillimet në Liban nga negociatat me Iranin, ndërsa Teherani këmbëngul se çdo marrëveshje duhet të përfshijë edhe paqe në Liban.

Të dielën, një zyrtar amerikan tha se sekretari i Shtetit, Marco Rubio, i kishte propozuar një plan për “ulje graduale të tensioneve” Netanyahut dhe presidentit libanez Joseph Aoun.