Ariola me ndryshime të Liverpool, kërkon pesë largime dhe katër transferime të reja

Liverpooli ka hyrë në një epokë të re pas vendimit të klubit për të shkarkuar Arne Slotin, vetëm një vit pasi tekniku holandez e kishte udhëhequr skuadrën drejt titullit të 20-të kampion në Angli.

Megjithëse sezoni i fundit përfundoi me vendin e pestë në Premier League dhe sigurimin e një bilete për në Champions League, drejtuesit e klubit vendosën të bëjnë ndryshime në stafin teknik, duke i dhënë fund aventurës së Slotit në “Anfield”.

Menjëherë pas largimit të tij, emri i Andoni Iraolës u shfaq si kandidati kryesor për stolin e “The Reds”.

Strategu spanjoll kishte vendosur të largohej nga Bournemouth në fund të kontratës së tij dhe tashmë raportohet se ka arritur një marrëveshje në parim me klubin nga Merseyside.

Sipas raportimeve nga mediat angleze, Iraola ka identifikuar pesë objektiva kryesorë që dëshiron t’i sjellë në “Anfield” për të rindërtuar skuadrën dhe për ta rikthyer atë në garën për trofetë më të mëdhenj.

Liverpooli përballet me një verë të ngarkuar, pasi Mohamed Salah, Andy Robertson dhe Ibrahima Konate pritet të largohen si lojtarë të lirë, duke lënë boshllëqe të rëndësishme në repartet kryesore të ekipit.

Në krye të listës së dëshirave janë Yan Diomande i RB Leipzigut dhe talenti i Paris Saint-Germainit, Bradley Barcola, të cilët konsiderohen profile ideale për sistemin e lojës që Iraola dëshiron të aplikojë.

Një tjetër emër që po monitorohet nga afër është sulmuesi anësor i West Ham Unitedit, Jarrod Bowen.

Përveç repartit ofensiv, Liverpooli synon të shtojë cilësi edhe në mesfushë. Një nga objektivat kryesorë është Adam Wharton i Crystal Palace, i cili ka tërhequr vëmendjen me paraqitjet e tij të mira gjatë sezonit.

Në repartin defensiv, “Të Kuqtë” vazhdojnë të ndjekin nga afër mbrojtësin e krahut të Interit, Denzel Dumfries, i cili shihet si zëvendësues potencial për largimet e mundshme në mbrojtje.

Liverpooli gjithashtu ka alternativa të brendshme për repartin qendror të mbrojtjes. Talente si Jeremy Jacquet dhe Giovanni Leoni konsiderohen si opsione premtuese për të mbushur boshllëqet që mund të krijohen në skuadër.

Një tjetër mundësi që po shqyrtohet është rikthimi i ish-mbrojtësit të klubit, Jarell Quansah, i cili aktualisht aktivizohet te Bayer Leverkusen. Drejtuesit e Liverpoolit kishin përfshirë një klauzolë riblerjeje prej rreth 70 milionë funtesh në marrëveshjen që e dërgoi futbollistin në Gjermani, duke i lënë vetes derën e hapur për një rikthim të mundshëm në të ardhmen.

Me ndryshime të mëdha në horizont dhe me Iraolën pranë stolit, Liverpooli duket i gatshëm të nisë një proces të ri rindërtimi, me synimin për t’u rikthyer në majat e futbollit anglez dhe evropian.