Abdixhiku: Kryeministër i qeverisë së tranzicionit të jetë një person unifikues, jo polarizues

Kryetari i LDK-së, Lumir Abdixhiku ka propozuar krijimin e një qeveri të tranzicionit deri në zgjedhjen e presidentit të ri, në të cilën do të merrnin pjesë të gjitha partitë.

Ai u pyet në një konferencë për media se kujt do t’i takonte posti i kryeministrit në një qeveri të tillë.

“Shiqo, ne duhet të ulemi në tavolinë dhe të flasim për atë çështje”, tha ai.

Abdixhiku tha se kryeministri duhet të jetë “unifikues”, ashtu si edhe ministrat.

“E para, le të nisim një proces që nis zhbllokimin e krizës së tanishme dhe krijon një momentum të mirë për Republikën e Kosovës brenda një afati të shkurtër, por duhet të jetë kryeministër unifikues dhe kabinet me ministra unifikues, e jo fare polarizues”.

Abdixhiku kërkoi të takohet me liderër e partive të tjera për ta diskutuar këtë ide, ndërsa tha se kryetari i AAK-së, Ramush Haradinaj tashmë e ka pranuar atë.