Harry Kane do të veshë fanellë ndryshe prej bashkëlojtarëve të tij në ndeshjen e sotme

Fanella e Anglisë që do të veshë Harry Kane do të duket paksa ndryshe nga ajo e shokëve të tij të ekipit gjatë ndeshjes hapëse të Anglisë në Kupën e Botës kundër Kroacisë – dhe ka një arsye interesante për këtë.

Anglia e nis fushatën e saj në Grupin L kundër rivalëve të vjetër, Kroacisë, në Arlington të Teksasit, të mërkurën më 17 qershor, me Thomas Tuchel që pritet të marrë disa vendime të rëndësishme për formacionin para fillimit të takimit.

Është raportuar gjerësisht se trajneri gjerman do t’u japë përparësi Anthony Gordonit dhe Noni Maduekes ndaj Marcus Rashfordit dhe Bukayo Sakas në sulm, ndërsa Marc Guéhi pritet të mbetet jashtë formacionit, me Ezri Konsan që ka gjasa të luajë përkrah John Stonesit në qendër të mbrojtjes.

Ndërkohë, Jude Bellingham pritet të luajë në rolin e numrit 10, me Declan Rice dhe Elliot Anderson pas tij në mesfushë.

Veteranët Jordan Pickford dhe kapiteni Kane gjithashtu pritet të jenë titullarë, ndërsa Reece James dhe Nico O’Reilly kanë gjasa të marrin vendet në krahët e mbrojtjes.

Kane do të barazohet me David Beckhamin si lojtari i tretë me më shumë paraqitje në historinë e Anglisë kur të nisë ndeshjen kundër Kroacisë, pasi sulmuesi i Bayern Munich do të regjistrojë ndeshjen e tij të 115-të me kombëtaren.

Duke folur për këtë arritje, Kane i tha “ITV”: “Për mua personalisht, të jem aty ku jam tani, është gjithmonë e vështirë ta përvetësoj plotësisht gjithçka. Kur je i ri, sidomos në atë moshë, mendoj se isha 10 ose 11 vjeç, thjesht ke ëndrra dhe aspirata për t’u bërë futbollist”.

“Tani, që shpresoj të arrij 115 ndeshje me kombëtaren dhe të marr pjesë në turneun tim të gjashtë, të jem kapiten për kaq gjatë, rekordi i golave dhe të gjitha këto gjëra që kam arritur gjatë rrugës janë burim krenarie të madhe, por gjëra që ndoshta nuk do të mund t’i vlerësoj plotësisht deri kur të ndalem, sepse, siç e dini ju, gjithçka ka të bëjë me sfidën e radhës, momentin e radhës. Të bëhem më i mirë, të përmirësohem, dhe ky do të jetë mentaliteti im deri në ditën kur të ndaloj së luajturi”, shtoi ai.

Ndërsa barazimi i rekordit të Beckhamit për paraqitje me Anglinë pa dyshim do të përmendet gjerësisht, tifozët mund të mos e dinë pse kapiteni i Anglisë do të mbajë një fanellë paksa të ndryshme nga pjesa tjetër e skuadrës.

Fanella e Kane me Anglinë do të ketë një emblemë speciale të “Këpucës së Artë” gjatë gjithë Kupës së Botës, pasi ai është një nga vetëm tre lojtarët – së bashku me Kylian Mbappé dhe James Rodríguez – që e kanë fituar më parë këtë çmim.

Kapiteni i Anglisë fitoi Këpucën e Artë në Kupën e Botës 2018, ndërsa Mbappé dhe Rodríguez e fituan respektivisht në vitet 2022 dhe 2014.

Lojtarët që po bëjnë debutimin e tyre në Kupën e Botës do të mbajnë gjithashtu një emblemë speciale debutimi për të shënuar paraqitjen e tyre të parë në turne.

Pas ndeshjeve, këto emblema hiqen nga fanellat dhe vendosen në një kartelë koleksionuese të Topps.

Duke folur në maj, presidenti i FIFA-s, Gianni Infantino, njoftoi partneritetin e FIFA-s me Fanatics – kompania mëmë e Topps – i cili do të nisë në vitin 2031, duke i dhënë fund partneritetit të mëparshëm me Panini.

“Kjo marrëveshje fillon vetëm pas disa vitesh dhe do të zgjasë për shumë vite e turne të ndryshëm, por ajo përfshin gjithashtu programin e parë ndonjëherë të emblemave në fanellat e lojtarëve, i cili do të nisë që në këtë Kupë Bote,” tha Infantino.