Kosova organizatore e Kampionatit Mesdhetar të Karatesë në vitin 2027-të

Prishtina do të jetë qendra e karatesë mesdhetare në vitin 2027, pasi Federata e Karatesë e Kosovës, ka siguruar organizimin e Kampionatit Mesdhetar të Karatesë për kategoritë U14, Kadet, Junior dhe Senior.

Vendimi u mor sot në Asamblenë e Federatës Mesdhetare të Karatesë, e mbajtur në Alexandria të Egjiptit, ku kandidatura e Kosovës mori mbështetje unanime nga të gjitha federatat anëtare.

Ky sukses i rëndësishëm për sportin kosovar vjen si rezultat i angazhimit të Federatës së Karatesë së Kosovës dhe përfaqësimit të saj në Asamble nga kryetari Besart Baruti dhe sekretari i përgjithshëm Nazmi Gashi, të cilët prezantuan para delegatëve kërkesën dhe vizionin e Kosovës për organizimin e kampionatit.

“Asambleja e Federatës Mesdhetare e mbështeti unanimisht këtë kërkesë dhe të gjithë anëtarët votuan pro”, thuhet në njoftimin e Federatës së Karatesë së Kosovës, duke konfirmuar besimin e plotë që komuniteti mesdhetar i karatesë i ka dhënë Kosovës për organizimin e këtij eventi prestigjioz.

Kampionati Mesdhetar i Karatesë 2027 pritet të sjellë në Prishtinë qindra sportistë, trajnerë, zyrtarë dhe mysafirë nga vendet e rajonit mesdhetar, duke e kthyer kryeqytetin në një qendër të rëndësishme sportive dhe promovuese të Kosovës.

Federata e Karatesë e Kosovës e ka cilësuar këtë arritje si një moment historik për karateistët dhe sportin në vend.

“Ky është një sukses i madh për sportin e karatesë dhe për Kosovën, duke dëshmuar besimin dhe respektin që gëzon Federata e Karatesë e Kosovës në arenën ndërkombëtare”, thuhet më tej në reagimin zyrtar të federatës.

FKK ka shprehur gjithashtu mirënjohje për institucionet vendore që kanë mbështetur kandidaturën e Kosovës.

“Federata e Karatesë e Kosovës shpreh mirënjohjen e saj për Ministrinë e Sportit dhe Rinisë si dhe për Komitetin Olimpik të Kosovës për mbështetjen e vazhdueshme dhe kontributin e dhënë në sigurimin e organizimit të këtij kampionati”, thuhet në njoftim.

Me organizimin e Kampionatit Mesdhetar 2027, Kosova jo vetëm që forcon pozitën e saj në hartën sportive ndërkombëtare, por dëshmon edhe kapacitetin për të pritur dhe menaxhuar ngjarje të mëdha sportive me rëndësi rajonale dhe ndërkombëtare.