Një regull pak i njohur i FIFA-s mund të ndikojë tek Anglia, me dy kombëtare tjera që do të përfitojnë

FIFA ka bërë një ndryshim të rëndësishëm në mënyrën se si përcaktohet renditja në grupet e Kupës së Botës, një lëvizje që mund të ndikojë edhe tek Anglia, ndërsa dy kombëtare tashmë kanë përfituar nga ky rregull i ri.

Ndërsa Botërori po hyn në raundin e dytë të ndeshjeve të fazës së grupeve, disa skuadra kanë nisur të sigurojnë kalimin në fazën me eliminim direkt, ndërsa të tjera tashmë janë eliminuar.

Më 19 qershor, SHBA-ja e drejtuar nga Mauricio Pochettino zhvilloi një paraqitje të shkëlqyer ndaj Australisë në Seattle, duke fituar 2-0 falë një autogoli të Cameron Burgess dhe një goli me kokë të Alex Freeman.

Kjo fitore i siguroi bashkëorganizatorëve një vend në fazën e 1/32-ës së finales, edhe pse u mbetet ende për t’u luajtur ndeshja e Grupit D kundër Turqisë.

Ndërkohë, Turqia u eliminua nga turneu pas humbjes 1-0 ndaj Paraguait, i cili luajti të gjithë pjesën e dytë me 10 lojtarë pasi Miguel Amorim u përjashtua me karton të kuq për mbulimin e gojës në San Francisko.

Edhe Haiti u eliminua pas humbjes 3-0 ndaj Brazilit në Filadelfia.

Haiti dhe Turqia ndodhen të dyja tri pikë prapa skuadrave të vendit të tretë në grupet e tyre, por nuk kanë më mundësi t’i arrijnë ato për shkak të një ndryshimi pak të njohur në rregulloren e FIFA-s.

Më parë, FIFA përdorte golavarazhin e përgjithshëm si kriterin kryesor kur ekipet kishin pikë të barabarta.

Megjithatë, para këtij Botërori, organizata vendosi që përparësi të kishte rekordi i ndeshjeve direkte mes skuadrave.

Si rezultat, për shkak se Turqia ka humbur të dy ndeshjet kundër Paraguait dhe Australisë, edhe nëse fiton ndaj SHBA-së në ndeshjen e fundit dhe barazohet me pikë me njërën prej këtyre skuadrave, ajo sërish do të eliminohet sipas rregullit të ri.

I njëjti skenar vlen edhe për Haitin, që do të përballet me Marokun. Haiti tashmë është mposhtur nga Skocia dhe Brazili, ndaj edhe nëse arrin të barazohet me pikë me skuadrën e drejtuar nga Steve Clarke, do të eliminohet.

Anglia mund të përfitojë nga ky ndryshim nëse mposht Ganën më 23 qershor. Nëse skuadra e Thomas Tuchel fiton dhe Panamaja nuk arrin të mposhtë Kroacinë, anglezët do të sigurojnë vendin e parë në Grupin L një ndeshje para përfundimit të fazës së grupeve.

E njëjta gjë vlen edhe për Ganën, e cila mund të sigurojë kreun e grupit nëse mposht Anglinë dhe Kroacia nuk fiton ndaj Panamasë.

Meksika, ashtu si SHBA-ja, ka përfituar gjithashtu nga ky rregull dhe do të avancojë në fazën e 1/32-ës së finales pas fitoreve ndaj Afrikës së Jugut dhe Koresë së Jugut në dy ndeshjet e para.

FIFA përdorte raportin e golave deri në vitin 1966, përpara se të kalonte te sistemi i golavarazhit në vitin 1970. Ndërkohë, UEFA e ka zbatuar prej kohësh sistemin e ndeshjeve direkte në garat e saj, siç është Liga e Kampionëve.

Arsyeja e këtij ndryshimi lidhet me shmangien e ndikimit të rezultateve ekstreme, si fitorja 7-1 e Gjermanisë ndaj Curaçaos, e cila në sistemin e vjetër do t’i jepte gjermanëve një avantazh të madh në golavarazh.

Nëse skuadrat mbyllin fazën e grupeve me pikë të barabarta, FIFA përdor disa kritere për t’i ndarë ato:

Pikët në ndeshjet direkte mes skuadrave të përfshira;

Golavarazhi në ndeshjet direkte;

Golat e shënuar në ndeshjet direkte;

Golavarazhi i përgjithshëm në grup;

Golat e shënuar në grup;

Fair Play;

Renditja botërore e FIFA-s.

Në rastet më ekstreme, renditja botërore mund të jetë faktori që përcakton nëse një skuadër avancon apo eliminohet nga Kupa e Botës.