Shifrat marramendëse — ja sa miliona euro janë shpenzuar për mbrojtjen e Thaçit, Veselit, Selimit, Krasniqit…

Ministria e Drejtësisë, e cila menaxhon fondin shtetëror për të akuzuarit nga Dhomat e Specializuara, në një përgjigje dhënë për gazetën “Bota sot”, ka treguar se deri më tani janë shpenzuar mbi 32 milionë euro për mbrojtjen e të akuzuarve nga Gjykata Speciale.

Sipas Ministrisë, për mbrojtjen e Hashim Thaçit, avokatët e tij janë paguar 5 milionë e 353 mijë e 301 euro (5,353,301.03 €).

Avokatët e Jakup Krasniqit, deri më tani, janë paguar me 5 milionë e 677 mijë e 250 euro (5,677,250.00 €).

Për avokatët e Kadri Veselit, nga buxheti i Kosovës janë paguar 5 milionë e 229 mijë e 724 euro (5,229,724.91 €).

5 milionë e 499 mijë e 700 euro (5,499,700.00 €) janë shpenzuar nga fondi shtetëror për avokatët e Rexhep Selimit.

Ndërsa me 2 milionë e 912 mijë e 672 euro (2,912,672.14 €) janë paguar avokatët e Salih Mustafës, i njohur si komandant Cali.

Për mbrojtjen e Pjetër Shalës, deri më tani janë paguar 2 milionë e 945 mijë euro (2,945,000.00 €).

2 milionë e 239 mijë e 163 euro (2,239,163.94 €) janë shpenzuar për mbrojtjen e Nasim Haradinajt.

Kurse 2 milionë e 367 mijë e 750 euro (2,367,750.00 €) janë shpenzuar për mbrojtjen e Hysni Gucatit.

11 mijë euro janë shpenzuar për mbrojtjen e Ismet Bahtijarit, ndërsa 4 mijë euro për mbrojtjen e Bashkim Smakajt.

Kujtojmë se që nga 5 nëntori i vitit 2020, Hashim Thaçi, ish-president i Kosovës, Kadri Veseli, ish-kryetar i PDK-së, Rexhep Selimi, ish-shef i Grupit Parlamentar të Vetëvendosjes, dhe Jakup Krasniqi, ish-kryetar i Kuvendit, po akuzohen nga Gjykata Speciale edhe për vrasjen e kundërshtarëve politikë, anëtarë të Lidhjes Demokratike të Kosovës dhe përkrahës të presidentit historik, Ibrahim Rugova.