“Mbajeni përgjegjës secilin kryetar për premtimet e dhëna”

Kryeministri në detyrë i Kosovës dhe kryetari i Lëvizjes Vetëvendosje, Albin Kurti, ka falënderuar qytetarët për pjesëmarrjen në balotazhin e djeshëm, duke e cilësuar atë si dëshmi të pjekurisë demokratike dhe përkushtimit qytetar ndaj vendit, transmeton Kosova Post.

Në një postim në rrjete sociale, Kurti u shpreh mirënjohës ndaj të gjithë atyre që ushtruan të drejtën e votës, duke theksuar rëndësinë e mbajtjes së përgjegjësisë ndaj kryetarëve të komunave për premtimet e dhëna.

“Ju falemnderit për pjesëmarrje në balotazhin e djeshëm të gjithë juve që e ushtruat të drejtën e votës. Treguat vullnet dhe pjekuri, i kontribuat demokracisë në Kosovë dhe orientimit të politikave publike në komunat tuaja. Mbajeni përgjegjës tani secilin kryetar për premtimet e dhëna,” ka shkruar Kurti.

Ai gjithashtu u është drejtuar aktivistëve të Lëvizjes Vetëvendosje, duke theksuar se tash partia do të qeverisë në shtatë komuna – më shumë se në çdo periudhë tjetër më parë.

“Lëvizjen tonë s’e ndali dot as bashkimi i të gjithë kundërshtarëve. Ju falemnderit çdonjërit për angazhimin. Na presin shumë punë e sfida, që do të thotë se para nesh ndodhen shumë suksese e fitore,” ka shtuar Kurti.