“Do të jetë caku i radhës”

Presidenti i Shteteve të Bashkuara, Donald Trump, ka ashpërsuar retorikën ndaj homologut të tij kolumbian, Gustavo Petro, duke paralajmëruar se ai mund të bëhet shënjestra e radhës në fushatën amerikane kundër trafikut të drogës.

Deklaratat u bënë të mërkurën gjatë një tryeze të rrumbullakët në Shtëpinë e Bardhë me drejtues biznesesh. I pyetur nga një gazetar nëse kishte komunikuar me Petron, Trump reagoi ashpër, duke e akuzuar Kolumbinë për prodhimin masiv të kokainës, raporton AlJazeera, transmeton Klankosova.tv.

“Kolumbia po prodhon shumë drogë. Ata kanë fabrika kokaine dhe e shesin direkt në Shtetet e Bashkuara”, tha Trump. “Ai duhet të zgjohet, përndryshe do të jetë i radhës. Shpresoj të më dëgjojë”.

Kërcënimet e reja ndaj Petros vijnë pak pasi Trump foli për një operacion ushtarak amerikan për sekuestrimin e një cisternë nafte në Detin Karaibe, pjesë e presionit ndaj Venezuelës dhe Iranit për shkelje të supozuara të sanksioneve.

Marrëdhëniet mes Trump dhe Petros, lideri i parë majtist në historinë moderne të Kolumbisë, kanë qenë prej kohësh të tensionuara. Edhe pse Kolumbia ka qenë prej dekadash një nga partnerët më të afërt të ShBA-së në luftën kundër drogës, komentet agresive të presidentit amerikan kanë acaruar raportet dypalëshe.