Aktuale, Lajme

Kurti premton paga të 13-ta, pensionim të parakohshëm dhe investime

Posted on by botaelajmeve

Me zotime të reja ka shpalosur planprogramin kandidati për kryeministër nga Lëvizja Vetëvendosje, Albin Kurti, i cili synon edhe një mandat qeverisës.

Para përkrahësve në Prishtinë, kreu i VV-së, Albin Kurti, shpalosi pesë vendimet e para që do t’i ndërmarrë si kryeministër: miratimin e buxhetit prej 4 miliardë eurosh për vitin 2026, procedimin e ligjit për çmimet tavan, procedimin e ndryshimeve ligjore që heqin kufizimin e punësimit për veteranët e UÇK-së që përfitojnë beneficione, si dhe investime në ushtri e polici, rend e ligj, arsim më cilësor dhe përkrahje për studentët.

“Gjatë mandatit të ri do të vëmë rend dhe ligj pa kompromis. Krahas luftës kundër krimit të organizuar, do të shtohen kapacitetet dhe programet për sigurinë publike. Siguria rrugore në shkolla dhe policimi në komunitet janë prioritet i mandatit të ri. Do të vijojmë me mbështetjen e Policisë dhe institucioneve të sigurisë me pajisje të specializuara dhe bashkëkohore, me shkollim, trajnim dhe armatim adekuat”, theksoi Kurti.

Kurti premtoi gjithashtu miratimin e vendimit për pagesën e pagës së 13-të për të gjithë shërbyesit publikë.

Ndër premtimet e Kurtit para elektoratit të Lëvizjes Vetëvendosje është edhe një pako për përballje me inflacionin, me vlerë prej 200 milionë eurosh, e cila përfshin mbështetje për pensionistët, fëmijët që përfitojnë shtesa, punëtorët e sektorit privat, si dhe rikthimin e skemës për subvencionimin e kursimit të energjisë elektrike.