Policia interviston 14 të dyshuar për manipulim të votave në Gjilan

Policia e Kosovës ka intervistuar 14 persona në Gjilan, pas dyshimeve për manipulim me vota në zgjedhjet e fundit parlamentare në këtë komunë.

Lajmin për RTKlive e konfirmoi Ismet Hashani, zëdhënës i policisë në Gjilan.

“Janë intervistuar 14 persona dhe varësisht nga të gjeturat, Policia Rajonale e Hetimeve me koordinim të ngushtë me Prokurorinë e Shtetit do të vazhdojë edhe intervistimin e personave të tjerë. Të gjithë personat e intervistuar me vendim të prokurorit janë liruar në procedurë të rregullt”, deklaroi Hashani.

Një aksion tjetër i Policisë së Kosovës bashkë me Prokurorinë Themelore në Prizren u realizua në Suharekë për të njëjtat motive, ku u intervistuar 71 persona dhe 19 në cilësinë e kryesuesve të komisioneve, janë ndaluar për 48 orë me urdhër të Prokurorit të Shtetit.