“Me këto kushte”/ Lumir Abdixhiku duhet t’i thotë po Albin Kurtit

Kosova vazhdon të mbetet pa institucione të reja, edhe tre muaj pas përfundimit të zgjedhjeve nacionale të 9 shkurtit.

Pas njëmbëdhjetë tentimesh ka dështuar zgjedhja e kryetarit të ri të Kuvendit të Kosovës, një post për të cilin partia fituese e zgjedhjeve të 9 shkurtit, Lëvizja Vetëvendosje, ka propozuar Albulena Haxhiun. Emri i saj është refuzuar nga opozita, duke e futur vendin në një krizë të thellë politike.

Duke parë bllokadën e krijuar, lideri i Lëvizjes Vetëvendosje, Albin Kurti, i ka bërë ftesë për koalicion liderit të Lidhjes Demokratike të Kosovës, Lumir Abdixhikut.

“Si kryetar i LVV-së dhe kryeministër në detyrë i Republikës së Kosovës, jam i interesuar dhe i gatshëm për marrëveshje politike me LDK-në. Sigurisht që kemi dallime në bindje politike dhe në politikat qeverisëse, por koalicionet bëhen pikërisht ndërmjet atyre që kanë dallime, duke vendosur të drejtat dhe nevojat e shtetit dhe të qytetarëve si prioritet. Ne edhe mund të shkojmë në zgjedhje të reja, ku pak gjë mund të ndryshojë për LDK-në, dhe mandej sërish do të na duhet të ulemi bashkë për koalicionin LVV-LDK! Pse ta bëjmë atëherë më vonë, kur mund ta bëjmë tash? Pse edhe një palë zgjedhje për të njëjtin koalicion?”, thuhet ndër të tjera në letrën e Kurtit.

Nga LDK ende nuk ka një përgjigje. Kreu i LDK-së, Lumir Abdixhiku, tha se do të ketë një përgjigje zyrtare nga partia për letrën e dërguar nga Kurti.

“Më lejoni të shkoj në zyrë, ta shoh letrën dhe do të jap përgjigje me kohë. I lus edhe njerëzit tanë që gjendjen e tanishme ta trajtojnë pa arrogancë. Do të kemi përgjigje zyrtare, ashtu siç i takon një partie”, ëstë shprehur dje Abdixhiku.

LDK t’i thotë po Kurtit

Por, analisti Nexhat Haziri shprehet se Abdixhiku duhet ta pranojë thirrjen e Kurtit për koalicion.

“Abdixhiku duhet t’i përgjigjet pozitivisht ftesës së Kurtit për takim dhe aty të propozohet një qeveri gjithëpërfshirëse, e cila do ta nxirrte vendin nga ky ngërç politik dhe ta përgatiste vendin për zgjedhje të parakohshme në prill të vitit të ardhshëm, kur është edhe koha për zgjedhjen e presidentit/presidentes”, u shpreh Haziri.

Sipas tij, përbërja aktuale e Kuvendit nuk ka konsensus për zgjedhjen e presidentit/presidentes.

“Nuk shoh mundësi të tjera, e aq më pak një koalicion qeverisës mes VV-së dhe LDK-së, për arsye të shumta. Njëra ndër kryesoret është se këto dy subjekte politike nuk kanë besim te njëra-tjetra dhe se lehtë mund t’u përsëritet historia”, thekson Haziri.

Opozita kundër VV-së

Ndërsa, analisti tjetër, Zejnullah Jakupi, thekson se PDK dhe LDK janë bashkë kundër Vetëvendosjes, gjë e cila u dëshmua edhe dje gjatë seancës së Kuvendit.

“Në përpjekjen e 11-të, PDK, LDK, Lista Serbe dhe AAK ishin kundër formimit të një komisioni që të votohet në mënyrë të fshehtë. Në seancat e fundit u vërtetua se këto parti janë bashkë. Nuk pranojnë votim të fshehtë. Ish-opozita duket se është e paorientuar, nuk është e gatshme për koalicion me LVV-në, ose anojnë sipas kalkulimeve të tyre. Kanë frikë se mos ndonjëra nga partitë i afrohet LVV-së. Këtë e tregoi reagimi i Gani Gecit, kur kishte kuptuar se PDK do t’i shkonte kryeministrit Kurti për të biseduar rreth formimit të organeve të Kuvendit. Prandaj secila reagon kundër LVV-së, sipas ‘dilemës së të burgosurit’. Gani Geci reagon në të njëjtën dilemë”, nënvizon Jakupi.

“Herë e sheh të mundshëm koalicionin me LVV-në dhe thotë se do të ishte një koalicion i madh shqiptar, por për këtë vendos kryesia e partisë, dhe e quan një koalicion me LVV-në si të keqen më të vogël të mundshme, ndërsa me PDK-në kurrsesi. Pra, kur PDK i afrohet LVV-së, fillojnë ankesat apo akuzat kundër LVV-së, dhe e kundërta: kur LVV i drejtohet LDK-së, reagon PDK. Të dyja kanë frikë se mos njëra nga partitë e mëdha po bën koalicion me VV-në”, shpjegon Jakupi.

Më tej, Jakupi deklaron se Abdixhiku është i gatshëm ta pranojë koalicionin me VV-në, nëse i ofrohet posti i kryeministrit.

Deklarimi i Lumir Abdixhikut se do të japë një përgjigje në letrën e kryeministrit Kurti duket shumë i cekët, sepse përmbajtja e letrës dihet. Aty nuk ka detaje për ndarje të posteve. Ai thotë se do ta shikojë në zyrë, që nënkupton se do të këshillohet me Këshillin e LDK-së. Kjo sugjeron se Abdixhiku do ta pranonte koalicionin, nëse i ofrohet posti i kryeministrit, ndërsa posti i presidentit i mbetet Albin Kurtit”, tha Zejnullah Jakupi.

Por, Jakupi hedh dyshime se LDK është më e lidhur me PDK-në sesa me VV-në.

“Të gjitha këto për momentin janë kalkulime. Kjo pajtueshmëri do të ishte edhe konstruktive dhe ndarja e ministrive do të ishte shumë fluide, ndërsa institucionet do të formoheshin shumë shpejt. Një dobësi që e tregon Lumir Abdixhiku është fakti se ai dhe LDK-ja janë fort të lidhur me PDK-në, sikur në çdo hap këshillohen prej saj që të mos hyjnë në koalicion me VV-në, duke e bërë akuzën e përbashkët se me Albin Kurtin nuk mund të qeveriset. LVV, nga ana e saj, nuk ka ndikim në LDK, siç ka PDK. Nëse do të thyhej ndikimi i PDK-së ndaj krerëve të LDK-së, atëherë ky koalicion do të bëhej brenda natës”, përfundon analisti Zejnullah Jakupi