Transferimi i Bastonit po shkon drejt dështimit, Barça ndjehet e zhgënjyer

Sipas raportimeve në Itali, Barcelona është ndjerë e “zhgënjyer” nga fakti që një marrëveshje e mundshme për mbrojtësin e Interit, Alessandro Bastoni, duket se po shuhet, ndërsa ka edhe sugjerime që gjiganti i La Ligas duhet të prioritizojë afrimin e një sulmuesi të ri, dhe jo një mbrojtësi.

Prej disa javësh, raportet në Spanjë dhe Itali e kanë lidhur Barcelonën me një lëvizje verore për Bastonin, i cili ishte pjesë e skuadrës që festoi titullin e 21-të në Serie A me Interin fundjavën e kaluar.

Presidenti i “Zikaltërve”, Beppe Marotta, ka pranuar së fundmi: “Nuk do ta mohoj se ka interes nga Barcelona (për Bastonin), por ende nuk ka asgjë konkrete”.

Megjithatë, sipas përditësimeve të fundit nga “La Gazzetta dello Sport”, interesi i Barcelonës për mbrojtësin e majtë po fillon të zbehet.

Ka disa arsye për këtë, por më e rëndësishmja duket të jetë mungesa e dëshirës së lojtarit për t’u larguar nga “San Siro” këtë verë.

“La Gazzetta dello Sport” pretendon se Interi e vlerëson Bastonin rreth 70 milionë euro, ndërsa Barcelona kishte besuar se mund të negocionte një shumë më të ulët, rreth 50 milionë euro.

Që kjo të ndodhte, do të duhej që Bastoni të shprehte dëshirën për t’u transferuar te Barcelona, duke detyruar Interin ta shiste.

Sipas raportit, kjo nuk ka ndodhur dhe Interi nuk ka ndërmend ta lërë të largohet për një çmim të ulët.

Qoftë 50 apo 70 milionë euro, ky mbetet një investim i madh për një klub që vazhdon të ndiejë ndikimin e rregullave të rrepta financiare të La Ligas.

Si rezultat i problemeve të fundit financiare, Barcelona ka arritur të bëjë vetëm disa transferime të përhershme në dy sezonet e fundit: Dani Olmo për 58 milionë euro, Joan García për 27 milionë euro dhe talentin Roony Bardghji për 2 milionë euro.

Duke qenë se praktikisht ka pasur vetëm një transferim të madh çdo verë në dy vitet e fundit, “La Gazzetta dello Sport” sugjeron se Bastoni nuk do të ishte përdorimi më i mirë i fondeve në merkaton e ardhshme.

Kjo sepse Barcelona ka shumë gjasa të ketë nevojë edhe për një sulmues të ri, pasi Robert Lewandowski, i cili përfiton një pagë të lartë dhe është 37 vjeç, pritet të largohet këtë verë. Kjo do t’i linte trajnerit Hansi Flick një boshllëk të madh në qendër të sulmit, duke e bërë këtë repart prioritet më të madh sesa afrimi i një mbrojtësi luksi.