Kompania mediatike “Arena News” e “Telekom Srbija” zbarkon në Tiranë

Telekom Srbija” me një marrëveshjeje franshize, po e zgjeron markën “Newsmax Balkans” në Evropën Lindore, duke filluar me vende si: Sllovakia, Hungaria, Rumania, Greqia dhe Shqipëria.

Mediet tiranase raportuan për një shoqëri tregtare të regjistuar dje në Tiranë, një kompani me kapital serb – kompaninë “Arena News Channels Two Albania” sh.p.k., e cila është në pronësi të “Telekom Srbija” AD, nëpërmjet kompanisë tjetër serbe: “ARENA CHANNELS GROUP DOO BEOGRAD”.

Nga të dhënat e lexuara në regjistrin tregrar të Republikës së Shqipërisë (QKB) kjo kompani është e regjistruar për të ushtruar aktivitet në fushën e medieve. Për këtë qëllim do ti drejtohemi me shkrim rregullatorit medial – AMA për të kuptuar nëse e njeta ka aplikuar, apo, tashmë, është paisur me liçencë për të operuar si televizion.

Deri sa të kemi pranuar përgjigje nga AMA, kur do te botojmë vazhdimin, po e shoshitim pak këtë kompani të regjistruar në Tiranë dhe kompaninë e saj amë në Beograd të Serbisë me të dhëna nga regjistrat tregtarë të të dy vendeve dhe profilet e akterëve në LinkedIn e në Media Ownership Monitor.

Shoqëria tregtare e regjisturar në Republikën e Shqipërisë

Emri i kompanisë është “Arena News Channels Two Albania”, me numër të regjistrimit: M52320021O. Pronarë i vetëm, me 100% të kuotave, kompania serbe: “Arena News Channels Two DOO Beograd” (21995576), e regjistruar në Beograd, Serbi.

Objekti i aktivitetit: (i) Prodhimi, transmetimi dhe shpërndarja e përmbajtjeve audiovizive nëpërmjet televizionit, internetit, platformave digjitale dhe rrjeteve sociale. (ii) Botimi dhe administrimi i publikimeve elektronike dhe mediave online. (iii) Prodhimi, redaktimi dhe shpërndarja e materialeve video dhe audio për qëllime informuese, arsimore dhe argëtuese. (iv) Aktivitete gazetareske dhe shërbime agjencie, përfshirë mbledhjen, përpunimin dhe shpërndarjen e informacionit, lajmeve dhe raporteve. (v) konsulencë, (vi) marketing e shitje të hapësirës reklamuese.

Selia e regjistruar e kompanisë në rrugën “Dervish Shaba”, rrethrrotullimi i qendres tregtare “TEG”, Blloku B-1, Lagjja “Mjull-Bathore”, Tiranë. E-Mail: [email protected], kurse telefoni: +355 4 22 33 532.

I emëruar si drejtor, me mandat deri në 2030, z. Zoran Glišović (Gllishoviq), nga Beogradi i Serbisë, i cili, referuar profilit të tij në LinkedIn, në vendin e vet tek kompania amë e mbanë pozitën e zv. drejtorit komercial e për shërbime të përbashkëta.

Kurse, drejtor i kompanisë amë në Beograd është znj. Aleksandra Krsić (Alleksandra Kërstiq), e cila sipas këtij artikulli në Media Ownership Monitor Serbia, është një ish-drejtuese në televizionin “Happy” – një shtëpi mediale derivat i “TV Košava”-s (TV Koshava) të Maria Milošević (Millosheviq), vajzës së kasapit të Ballkanit Sllobodan Millosheviq.

Të dy këta bashk, kanë punuar për Invej AD të Predrag Ranković (Rankoviq) – Peconi – një biznimen kontravers, privatizues në Serbi e më gjerë në Ballkan me paratë e Millosheviqit të fshehuara në Qipro e vegël besnike e Vuçiqit, një i arrestuar në vitin 2003 si pjestarë i dyshuar i “Klanit të Zemunit”.

Shoqëritë tregtare amë, regjistrimet në Serbi

Nga regjistri tregtar serb (APR – Agjensioni për Regjistra Tregtar) shofim se “ARENA NEWS CHANNELS TWO DOO BEOGRAD” është një shpk e regjistruar në Serbi më 13.03.2024, me numër amëz: 21995576 e me pronarë të vetëm shoqërinë serbe: “ARENA CHANNELS GROUP DOO BEOGRAD” (numri amëz: 20510293).

Kurse, kjo e fundit, “ARENA CHANNELS GROUP DOO” (20510293), është në pronësi të plotë nga Telekom Srbija AD.

Franshiza NewsMax Balkans e “Telekom Srbija”

Kompania “Arena News Channel Two DOO Beograd” është entiteti prapa një kanali televiziv serb – NewsMax Balkans. Në impresumin e publikuar në web-faqen e tyre, NewsMax Balkans shkruan: “Redaksia e televizionit ‘Newsmax Balkans’ është themeluar në mars të 2024, si partneri i parë medial i televizionit amerikan Newsmax”.

Kurse, kompani amë e saj – “ARENA SPORT” njihet si vegla më efikase e Vuçiqit për t’i blerë me radhë të gjitha përmbajtjet atraktive sportive përtej secilës logjikë ekonomike, me qëllim që të dominojë tregun edhe në Serbi dhe më gjërë në Ballkan. Më heret kemi shkruar për skandalin e kabllorit ArtMotion në Kosovë, që transmetonte ndeshje futbolli vetëm në serbisht e që emitonte spote glorifikuese për terroristat e Banjskës.

Në komunikatën zyrtare të “Telekom Srbija” me rastin e lidhjes së marrëveshjes së franshizës për NewsMax TV në Ballkan, shkruante se: “Vladimir Lučić (Vlladimir Lluçiq), drejtor ekzekutiv i “Telekom Srbija” AD, është në krye të partneritetit me kompaninë Newsmax për të ngritur e zgjeruar franshizën “Newsmax Balkans”. Përmes kësaj marrëveshjeje franshize, “Telekom Srbija” po e sjell markën “Newsmax” në Evropën Lindore, duke filluar me vende si: Sllovakia, Hungaria, Rumania, Greqia dhe Shqipëria”.

Lluçiq njihet edhe si person që publikisht shprehet kundër pavarësisë dhe sovranitetit të Republikës së Kosovës. Lluçiqi fyean e nënçmon insitucionet e Kosovës dhe udhëheqësit e saj. Këtë ai e shprehë haptas nëpër intervista të ndryshme, që zakonisht i jep në medie të afërta me regjimin e Vuçiqit, si: Tanjug, Happy TV, EuroNews, etj.

Kompania shtetërore që drejton Lluçiq ka aksione tek “Banka Poshtanska Shtedionica” të cilën organet e Republikës së Kosovës e patën mbyllur në gusht të 2024, sepse operonte pa liçencë në vendin tonë e ishte burim i qarkullimit të pagesave fantome me dinarë serb.

Gjithashtu, sipas vet fjalëve të tij në një emision (min. 02:55), Lluçiq deklaronte se kompanisë së tij bijë në Kosovë – mts DOO i kishte lidhur marrëveshje qiraje me “Postën e Serbisë”, “postë” kjo e cila vepronte në vendin tonë ilegalisht (pa liçencë) e në objekte që ja kishte uzurpuar Postës së Kosovës. Edhe kësaj “poste” ju vë dryri nga organet kompetente të Republikës tonë në gusht të 2024 e janar të 2025. Në këtë emision Lluçiq ishte bashk me Zoran Anxhellkoviç – ish-administratorin e dhunshëm të Millosheviqit në Kosovë e pronarë mediash në Serbi, sot Kryesuesin e Bordit të ndërmarrjes shtetërore serbe “Posta e Serbisë” e të “Hekurudhave të Serbisë”

“Telekom Srbija” – operatori shtetëror serb i komunikimeve elektronike, kabllore e mediale është ndër veglat kryesore të Vuçiqit për të manipuluar opinionin publik në Serbi e për zbatimin e “Botës Serbe” në Ballkan. Të bëmat e saj kanë qenë të sanksionuara edhe në Evropë, sikurse rasti kur “Telekom Srbija” kishte aktuar si proxy i Russia Today e i Sputnikut rus në Gjermani. Kjo vegël e Serbisë ka shtrirje edhe në Kosovë, konform një marrëveshjeje të nënshkruar në Bruksel nga Hashim Thaçi e Aleksandër Vuçiq në vitin 2015.

Së fundmi, “Telekom Srbija” – ky predator shtetëror serb, e ka blerë edhe të vetmen kompani mediale që i ka rezistuar diktaturës së Vuçiqit në Serbi – United Group. Disa ditë pas kësaj blerjeje, Projekti për Raportim të Krimit të Organizuar e Korrupcionit, publikoj përgjime që tronditën opinionin në Serbi e më gjerë. Në këto audio-materiale, autencitetin e të cilave e kanë konfirmuar palët, Lluçiq i drejtohej drejtorit të ri të kompanisë me fjalët: “… me kërkesë të Vuçiqit duhet t’i largosh nga puna këta redaktorë e gazetarë”.

Televizioni “NewsMax TV” dhe franshiza për Ballkan e dhënë tek “Telekom Srbija”

Televizioni “NewsMax TV” është një kanal televiziv amerikan në pronësi të Newsmax Inc., i përshkruar si konservator, pro-Trump, i krahut të djathtë, herë herë edhe i ekstremit të djathtë.

Programacioni i këtij rrjeti televiziv përbëhet kryesisht nga “talk show” të mbështetura në opinione politike, transmeton një format lajmesh e bisedash, përgjatë gjithë ditës e natës, kurse fundjavave emeton dokumentarë e filma.

Newsmax, Inc. është një kompani amerikane lajmesh e komentesh të opinioneve politike, që mbanë në pronësi medie dixhitale e rrjete televizive. NewsMax Inc. është themeluar nga Christopher Ruddy në vitin 1998. Christopher Ruddy, i lindur më 28 janar 1965, është një gazetar dhe menaxher biznesi. Z. Ruddy një person me pikëpamje konservatore politike, është drejtor ekzekutiv e pronar madhor i Newsmax Media.